'நம்பினால் நம்புங்கள்' - அனுபவங்கள் - 01

நம் வாழ்க்கையில் நிகழும் சில வித்தியாசமான அனுபவங்கள், நாம் இந்த உலகைப் பார்க்கும் பார்வையையே மாற்றிவிடும். கடவுள் மீது நம்பிக்கை, ஆவி பேய் போன்றவற்றின்மீது பயம், மாந்த்ரீகத்தின் மேஜிக்கல் சம்பவங்கள், இது போன்ற விஷயங்களில் யாருக்கும் அவ்வளவு சீக்கிரத்தில் பிடிப்பு ஏற்படுவதில்லை... ஆனால், அது அவரவர்களுக்கென்று தனிப்பட்ட அனுபவம் இல்லாத வரையில் மட்டும்தான்..!

இது போன்ற அமானுஷ்ய விஷயங்களைப் பற்றி நிறைய புத்தகத்தில் படித்திருக்கிறேன்..! கதைகள் படிக்க சுவாரஸ்யமாய்த்தான் இருக்கும்..! ஆனால், இதெல்லாம் உண்மையா..? இல்லை பொய்யா..? இதற்கு பதில் இந்த இரண்டு கேள்விகளுக்கும் மத்தியில் இருக்கிறது. அந்த பதிலைத் தேடி அலைந்த போது எனக்கு ஏற்பட்ட சில அனுபவங்களை உங்களுடன் பகிர்ந்துக் கொள்ள ஆவலாய் இருக்கிறேன்..!

சென்ற வருடம் (2009) ஜனவரி மாதத்தில், நான் ஜீ.டிவியில் 'நம்பினால் நம்புங்கள்' என்ற நிகழ்ச்சியை இயக்கிக்கொண்டிருந்தேன். டிவிக்கு நான் மிகவும் புதியவன் என்பதால், இந்த நிகழ்ச்சியை எப்படியும் சிறப்பாக கொண்டு வர வேண்டும் என்ற ஆவல், எனக்கும் என் குழுவினருக்கும் இருந்தது. இந்த நிகழ்ச்சியில் நம்பமுடியாத சம்பவங்களை நேரில் சென்று, சம்பந்தபட்டவர்களின் பேட்டி கண்டு, ஆதாரம் தேடி, சில சம்பவங்களின் காட்சிகளை நடிகர்களை வைத்து சித்தரிக்கபட்ட காட்சிகள் என்று படம்பிடித்து வழங்க வேண்டும். இதில் அலசப்படும் வழக்குகள் வித்தியாசமாகவும், சுவாரஸ்யமாக இருத்தல் மிக முக்கியம் என்று சேனல் தரப்பில் கூறியிருந்தனர்.

பொதுவாக இந்த நிகழ்ச்சிக்கு, ஆவி, பேய், அமானுஷ்யம், மாந்த்ரீகம் போன்ற தலைப்பின்கீழ்தான் சம்பவங்கள் அமையும். எனவே, பார்ப்போரிடமெல்லாம், 'உங்களுக்கு தெரிஞ்சு யாருக்காவது பேய் பிடிச்சிருக்கா, உ.தெ.யா...வது பில்லி சூன்யம் வச்சிருக்காங்களா..' என்று கேட்டுக்கொண்டிருந்தேன். என்னைப் பற்றி என்ன நினைத்திருப்பார்களோ..?

ஒருவழியாக நண்பன் ஒருவன் மூலம், சென்னையை அடுத்துள்ள பட்டாபிராம்-ல் 'தாவீது' என்ற ஒரு இளைஞனின் ஒரு சம்பவம் கிடைத்தது. அந்த சம்பவத்தை கேட்டதும் ஆச்சர்யப்படாமல் இருக்க முடியவில்லை. 'தாவீது' என்ற அந்த இளைஞன், பைக்கில் போய்க்கொண்டிருக்கும்போது, ஒரு லாரி விபத்தில் இறந்து போய், 14 மணிநேரத்திற்குப் பிறகு, சவக்கிடங்கிலிருந்து மீண்டும் உயிர்த்து எழுந்திருக்கிறான். இந்த நிகழ்வுக்கு அவன் வசிக்கும் ஏரியாவே சாட்சி சொன்னது. அதைவிட சுவாரஸ்யம் என்னவெனில், அவன் இறந்துகிடந்த அந்த மரண நேரத்தில் அவனுக்கு சில விநோத அனுபவங்கள் நிகழ்ந்துள்ளது. இதுவரை மனிதன் தெரிந்துக்கொள்ள போராடிக்கொண்டிருக்கும் AFTERLIFE என்ற விஷயத்துக்கு நம்மூரிலேயே ஒரு ஆதாரம் கிடைத்தது ஆச்சர்யமே..!

எனது சின்ன வயதில், எங்கள் எதிர்வீட்டில் ஒரு பாட்டி இறந்து போன 4 மணிநேரம் கழித்து மீண்டும் உயிருடன் எழுந்து உட்கார்ந்துவிட, எங்கள் தெருவே அந்த பாட்டியை வேடிக்கை பார்த்துக் கொண்டு நின்றார்கள். இந்த சம்பவம் என் மனதில் ஆழப்பதிந்திருந்தது... காரணம்... நானும் எனது நண்பர்களும், அந்த பாட்டிவீட்டில் கூடிய ஜனத்திரளால், தெருவில் க்ரிக்கெட் விளையாட முடியாமல் தவித்தோம்.

இறந்து எழுந்த அந்த பாட்டி, எமதர்மன் வந்து தன்னை அழைத்துப் போனதாகவும், வழியில் பெரிய பெரிய அரிசியும் அகத்திக்கீரையையும் சாப்பிட கொடுத்ததாகவும் என்னென்னவோ புலம்பியதாக நண்பர்கள் சொன்னார்கள். அது போல், இந்த தாவீது இறந்து கிடந்த போது தனக்கு ஏற்பட்ட அனுபவத்தைப் பற்றி என்ன சொல்லப்போகிறான் என்ற எண்ணம் எங்கள் குழுவின் ஆர்வத்தை கூட்டியது.

இந்த மரண அனுபவம் (Near Death Experience) குறித்து சில புத்தகங்களை தேடிப்படித்தேன். அதில் குறிப்பிட்டு சொல்வதென்றால், The Powerful Effect of Near Death Experience, Heading Towards Omega போன்ற புத்தகங்கள் Google Booksல் கிடைத்தது. மேலும் தமிழில் திரு.விக்கிரவாண்டி ரவிச்சந்திரன் அவர்கள் எழுதிய 'செத்துப் பிழைத்தவர்கள் சொன்ன செய்தி' என்ற புத்தகமும் மிகவும் உபயோகமாக இருந்தது.

ஒருவழியாக கேள்விகளை தொகுத்து பேட்டி காண ஆயத்தமாகிக்கொண்டிருந்தபோது... ப்ரொடக்ஷன் அலுவலகத்தில்  இருந்து ஃபோன் வந்தது..!

'ஹரீஷ்? உங்க எபிசோடுக்கு மேட்டர் ரெடியா..?'

'ரெடி சார்..! NEAR DEATH EXPERIENCE பற்றிய ஒரு கேஸ் கிடைச்சிருக்கு..!'

'ஓ.. நல்லது..! எந்த ஏரியா..?'

'பட்டாபிராம்..!'

'சரி, நல்ல டாபிக்தான். கொஞ்சம் வித்தியாசமாத்தான் இருக்கும்..! சேனல்ல தலைப்பு கேட்டுகிட்டே இருக்காங்க.. டைட்டில் ரெடி பண்ணிட்டீங்களா..?'

'ரெடி பண்ணிட்டேன் சார்... "தாவீதின் மரண அனுபவம்..!"'

'என்ன ஹரீஷ்... ஏதோ டப்பிங் படம் டைட்டில் மாதிரி இருக்கு..?'

'ஆமா சார்... ஆனா, பொருத்தமா இருக்கும்னு நினைக்கிறேன்..!'

'சரி... ப்ரொசீட் பண்ணுங்க..' என்று கூற, அடுத்த நாள் ஷூட்டிங்கிற்கு கிளம்பினோம்...

(தொடரும்...)